Չորեքշաբթի, 3 Ապրիլի 2024 18:36

Արմինֆո. Թվային փոխակերպմանն այլընտրանք չկա։ Այդ մասին ապրիլի 3-ին Doing Digital համաժողովի շրջանակում լրագրողների հետ զրույցում հայտարարել է Ամերիաբանկի տեղեկատվական տեխնոլոգիաների գծով տնօրեն Դավիթ Հովհաննիսյանը։

 

Հաշվի առնելով, որ այսօր ամեն ինչ շատ արագ փոխվում է, ներդրվում են նոր տեխնոլոգիաներ, մասնավորապես Artificial intelligence (Արհեստական բանականություն), Cloud computing (ամպային հաշվարկ) և այլն, փոխվում են նաև հաճախորդների ակնկալիքները: Վերջիններս, Հովհաննիսյանի խոսքով, նույնպիսի փորձ են ակնկալում բանկային հատվածում, որը նրանք տեսնում են, օրինակ, Google-ում, Amazon-ում։

 

Բացի այդ, փորձագետը նշել է, որ բարձրակարգ մասնագետները նախընտրում են աշխատել այն ընկերություններում, որոնք թվային փոխակերպման մասով արդեն որոշակի ճանապարհ են անցել:

Հովհաննիսյանը մեկ այլ կարևոր բաղադրիչ է համարել ընկերությունների ինտեգրումը թվային էկոհամակարգերին, ինչն այսօրվա պայմաններում հաջողության և արդյունավետության գրավական է: Մասնավորապես, նա նշել է, որ անհրաժեշտ է, որպեսզի ընկերությունները կարողանան ծառայություններ մատուցել և իրենց արտադրանքը վաճառել այդ համակարգերի միջոցով, ինչպես նաև իրենց հարթակներում ծառայություններ ներդնել նաև էկոհամակարգի այլ մասնակիցների համար:

 

Պատասխանելով ԱրմԻնֆո-ի թղթակցի հարցին' Ամերիաբանկի ՏՏ գծով տնօրենը նշել է, որ Հայաստանի թվային փոխակերպման ճանապարհին խոչընդոտներից մեկը մարդկային ռեսուրսների անհրաժեշտ մասշտաբի բացակայությունն է, որպեսզի բոլոր պահանջներն արդյունավետ իրականացվեն: Բացի այդ, նա նշել է կապի, այդ թվում, ինտերնետի հետ կապված խնդիրները ինչպես Հայաստանի ներսում ՝ մարզերի օրինակով, այնպես էլ Հայաստանի և այլ երկրների միջև։

 

Արդյունավետ թվային փոխակերպման համար Հովհաննիսյանը նշել է օտարերկրյա ուղղակի ներդրումների ներգրավման անհրաժեշտությունը, որոնց միջոցով կհաջողվի երկրում ավելի ակտիվ առաջ մղել թվային օրակարգը:

 

Հատկանշական է, որ շուրջ 20 տարի փորձագետն ապրել է արտերկրում, աշխատել տարբեր ընկերություններում ՝ ինչպես խորհրդատվության, այնպես էլ բանկային և ապահովագրական ոլորտներում: Համեմատելով Հայաստանը եվրոպական մի շարք երկրների հետ, որտեղ բնակվել է, Հովհաննիսյանը նկատել է. "Մեր պետությունում կան հատվածներ, որտեղ թվային փոխակերպման առումով առաջատար դիրքեր ենք զբաղեցնում": Այդ առնչությամբ նա նշել է հավելվածների օգտագործման բարձր մակարդակը, ինչը չի կարելի ասել, օրինակ, Գերմանիայի, Ավստրիայի մասին։

 

Ընդ որում, նա նշել է. "Վերադառնալով Հայաստան՝ աշխատանքի անցա Ամերիաբանկում, քանի որ այդ բանկը թվայնացման մասով առաջատար է ոչ միայն մեր երկրի սահմաններում, այլև եվրոպական մի շարք բանկերի համեմատ":

 

Նշենք, որ Doing Digital համաժողովի կազմակերպիչը SPRING PR-ն է, Fintech գործընկերը՝ Ամերիաբանկը: Համաժողովի գլխավոր բանախոսը համաշխարհային ճանաչում ունեցող ձեռնարկատեր, ֆուտուրոլոգ, բանախոս, միջազգային բեսթսելերների հեղինակ և մեդիա անձնավորություն Բրեթ Քինգը: Նա նաև աշխարհում առաջին բջջային Moven բանկի հիմնադիրն է: Հեղինակ է այնպիսի միջազգային բեսթսելերների, ինչպիսիք են < Բանկ 3.0>, <Բանկ 4.0>, <Լրացված իրականության դարաշրջան> և այլն:

 

Միջոցառումը նպատակ ունի մեկ հարթակում հավաքել ոլորտի առաջատարներին ՝ թվային փոխակերպման վերջին միտումները բացահայտելու և լավագույն փորձը կիսելու համար: Համաժողովը նպատակ ունի դառնալ լավագույն հարթակ նոր գաղափարների և տեխնոլոգիաների բացահայտման, մասնագիտական կապերի ձևավորման համար: Առաջին անգամ Doing Digital-ն անցկացվել է 2023 թվականին Երևանում ՝ Ամերիաբանկի աջակցությամբ:

 

Հիշեցնենք, որ Ամերիաբանկը առաջատար ֆինանսատեխնոլոգիական հաստատություն և կարևոր դեր է խաղում Հայաստանի տնտեսությունում: Հետևելով թվայնացման ուղուն՝ բանկը ներդրել է մի շարք նորարարական լուծումներ և հարթակներ և շարունակում է կատարելագործել դրանք ՝ ձևավորելով դինամիկ զարգացող ֆինանսատեխնոլոգիական միջավայր ՝ ուղղված մարդու տարբեր պահանջմունքների բավարարմանը: Ամերիան առաջինն է Հայաստանում ստեղծել էկոհամակարգեր ՓՄՁ-ների և անհատների համար ՝ ապահովելով "մեկ պատուհանի" սկզբունքով մի շարք բանկային և ոչ բանկային ծառայությունների հասանելիություն. Estate.ameriabank.am, Automarket.ameriabank.am, Business.ameriabank.am. Լինելով հաճախորդամետ ընկերություն՝ Ամերիան ձգտում է լինել հուսալի ֆինանսատեխնոլոգիական տարածք, որը տրամադրում է համալիր լուծումներ՝ կյանքի որակի բարելավման համար: