Չորեքշաբթի, 5 Հոկտեմբերի 2016 18:08

Արմինֆո. «ԻՆԳՈ ԱՐՄԵՆԻԱ» ԱՊԱՀՈՎԱԳՐԱԿԱՆ ՓԲԸ խորհրդի որոշմամբ Արևշատ Մելիքսեթյանը նշանակվել է ընկերության գործադիր տնօրենի պաշտոնում: Նա կփոխարինի ընկերության հիմնադիր և գործադիր տնօրեն Լևոն Ալթունյանին, ով ՀՀ նախագահի հրամանագրով 2016թ. սեպտեմբերի 27-ից ստանձնել է ՀՀ առողջապահության նախարարի պաշտոնը:

Ինչպես ԱրմԻնֆո գործակալությանը տեղեկացվել է Ընկերության մամուլի ծառայությունից, այդ պաշտոնում Արևշատ Մելիքսեթյանը նշանակվել է հոկտեմբերի 5-ին:

«Ապահովագրության և ապահովագրական գործունեության մասին» ՀՀ օրենքի համաձայն Արևշատ Մելիքսեթյանը կստանձնի գործադիր տնօրենի պարտականությունները ՀՀ Կենտրոնական բանկի կողմից գրանցվելուց հետո։ Մինչ այդ նա կհանդիսանա գործադիր տնօրենի ժամանակավոր պաշտոնակատար։ 

Ա.Մելիքսեթյանը 2007 թվականից զբաղեցնում է Ընկերության գործադիր տնօրենի առաջին տեղակալի պաշտոնը: Ստանձնելով Ընկերության ղեկավարումը, նա կապահովի ապահովագրության ոլորտում բարձրորակ և միջազգային ստանդարտներին համապատասխանող ծառայությունների մատուցման արդեն իսկ որդեգրված  քաղաքականության շարունակականությունը: Ի դեպ, Լևոն Ալթունյանի ղեկավարման 20 տարիների ընթացքում «ԻՆԳՈ ԱՐՄԵՆԻԱ»-ն փոքր ապահովագրական ընկերությունից դարձել է ՀՀ բոլոր խոշոր բնակավայրերում ավելի քան 40 գրասենյակ, շուրջ 1500 գործակալ և 250 աշխատակից ունեցող Հայաստանի ապահովագրության ոլորտում համակարգային կարևորություն ունեցող, միջազգային մակարդակի ապահովագրական ծառայություններ մատուցող կառույցի:

«ԻՆԳՈ ԱՐՄԵՆԻԱ»-ն շուկայում հայտնի է ոչ միայն իր զարգացման և առաջընթացի բարձր տեմպերով, այլև ուժեղ և կայացած թիմով, որում առաջին հերթին գնահատվում է գիտելիքը, պրոֆեսիոնալիզմն ու ձգտումը: Պատահական չէ, որ նորանշանակ տնօրենը, լինելով տնտեսագիտության թեկնածու և ապահովագրական ոլորտում հայտնի մասնագետ, այսօր էլ շարունակում է իր կրթությունը Քեմբրիջի համալսարանում: «ԻՆԳՈ ԱՐՄԵՆԻԱ»-ի հիմնադիր, ՀՀ առողջապահության նախարար Լևոն Ալթունյանը նշել է. «Հանգիստ եմ ինչպես «ԻՆԳՈ ԱՐՄԵՆԻԱ»-ի ապագայի, այնպես էլ ընկերության կողմից ստանձնած ռիսկերի հուսալի կառավարման համար, քանզի ինձ փոխարինում է ազնիվ, բանիմաց, փորձառու մասնագետ, ով իմ համախոհն է: Ավելի քան տասը տարի է, ինչ ճանաչում եմ Արևշատին, ով ոչ միայն ապահովագրության բացառիկ գիտակ է, այլև իրական առաջնորդ: Համոզված եմ, որ նրա ղեկավարությամբ «ԻՆԳՈ ԱՐՄԵՆԻԱ»-ն կշարունակի իր առաքելությունը և կնպաստի Հայաստանում ապահովագրական մշակույթի հետագա զարգացմանը»:

Ըստ ԻՆԳՈ Արմենիա ընկերության տվյալների, Արևշատ Մելիքսեթյանը  տնտեսագիտական գիտությունների թեկնածու է, անդամակցում է Մեծ Բրիտանիայի Chartered Insurance Institute-ին և հանդիսանում Հայաստանի Ավտոապահովագրողների Բյուրոյի խորհրդի անդամ։ 2015 թվականից առ այսօր նա սովորում է Քեմբրիջի համալսարանի Judge Business School-ի Գործադիր բիզնեսի կառավարում մագիստրատուրայում (Executive MBA): Մինչ այդ, 2009-2011 թվականներին սովորել է Հայաստանի Ամերիկյան Համալսարանի Բիզնես կառավարման Մագիստրատուրայում, Մարքեթինգ և Վաճառք գծով: 2004 – 2007թթ. եղել է ՀՀ Ֆինանսների և Էկոնոմիկայի նախարարության տնտեսագիտական հետազոտությունների ինստիտուտի ասպիրանտ: Իսկ բարձրագույն կրթությունն ստացել է 1999 – 2004թթ. -  Հայաստանի պետական տնտեսագիտական համալսարանում, Ապահովագրական գործ, Ապահովագրական ընկերությունների կառավարում մասնագիտությամբ (բակալավր):

Ըստ ԱրմԻնֆո գործակալության` Հայստանի Ապահովագրական Ընկերությունների Ռենկինգի, «ԻՆԳՈ Արմենիա» ապահովագրական ընկլերությունն աշխատում է ոչ կյանքի ապահովագրության 16 դասերով: Ընկերությունն առաջատար դիրքեր է զբաղեցնում առանցքային ցուցանիշներով: 2016 թվականի հուլիսի 1-դրությամբ ընկերության ապահովագրական պրեմիաները կազմել են 3,8 մլրդ դրամ (7,7 մլն դոլար), ապահովագրական հատուցումները`1.5 մլրդ դրամ (3,2 մլն դոլար): ընկերությունն ավանդաբար առաջատարն է առողջության ապահովագրության հատվածում, ինչպես նաև արտասահման մեկնողների ապահովագրության, դժբախտ պատահարներից ապահովագրության, ԿԱՍԿՈ, օդային տրանսպորտից շահագործումից բխող ապահովագրության հատվածներում, իսկ ապահովագրական մյուս դասերով 2-րդ տեղում է շուկայում: Ընկերության ակտիվներն այդ ամսաթվի դրությամբ հասել են 10 մլրդ դրամի: 2016 թվականի I կիսամյակում 2015-ի նույն ժամանակահատվածի համեմատ ընկերության զուտ շահույթն աճել է 3 անգամ:

«ԻՆԳՈ ԱՐՄԵՆԻԱ» ԱՓԲԸ-ն հիմնադրվել է 1997 թվականին, «ԷՖԵՍ» Ապահովագրական ՓԲԸ անվանմամբ, այնուհետև 2003 թվականին  ռուսական «Ինգոսստրախ» ապահովագրական ընկերությունը ձեռք է բերել բաժնետոմսերի 75%-ը, որին հետևել է ընկերության անվանափոխումը՝ «ԻՆԳՈ ԱՐՄԵՆԻԱ» ԱՊԱՀՈՎԱԳՐԱԿԱՆ ՓԲԸ: 2004 թվականին  ընկերությունը դարձել է միջազգային խոշորագույն «INGO» խմբի լիարժեք անդամ: Ընկերության բաժնետերերն են`բաժնետերերն են «Ինվեստ-Պոլիս» ՓԲԸ - 75% (պատկանում «Ինգոսստրախին») և գործադիր տնօրեն Լևոն Ալթունյան - 25%: